အချစ်ဆိုသည်မှာ ( WWKM)

အချစ်ဆိုသည်မှာ တဲ့......
ဒီခေါင်းစဉ်နဲ့ Tag post လေးတစ်ခေါက် ရေးပြီးခဲ့ပါပြီ။ကိုယ့်အသက်အရွယ်နဲ့ အချစ်အကြောင်းနဲ့ သိတ်မဆိုင်တော့သလို တွေးမိပြီး Tag post လေးကို ပြီးရင်ပြီးရော အဖြစ်ပဲ ရေးခဲ့လိုက်ပါတယ်။
ဟော..အခုတဖန် ..တီတီဝါ ရဲ့ အချစ်ကို သုတေသနလုပ်ချင်လို့တဲ့ မောင်ငယ်ကိုရဲက တက်ဂ်လာပြန်လေတော့ တခြားရေးထားကြတဲ့သူတွေဆီကို လိုက်ဖတ် ပညာယူပြီး ဘယ်လိုလေးရေးရင်ကောင်းမလဲလို့ စဉ်းစားမိတယ် ...ကဲ.. မထူးတော့ပါဘူး..ကိုယ့်အကြောင်းကိုယ်ပဲရေးတော့မယ်။ ကိုယ်ပိုင်ဆိုင်ထားတဲ့ ၊ ကိုယ်ပိုင်ဆိုင်နေတဲ့ အချစ်အကြောင်းလေးကိုပဲ မောင်နှမတွေကို ဝေမျှပေးဖို့ ဆုံးဖြတ်မိလိုက်ပါတော့တယ်....

လွန်ခဲ့တဲ့ ၁၄ နှစ်လောက်က ကျမ အချစ်ကို စတင်တွေ့ရှိခဲ့ပါတယ်။ကျမတွေ့ရှိခဲ့တဲ့ အချစ်က အလွန်ချစ်တတ်သော ယောကျာင်္းတစ်ယောက်ပဲ ဖြစ်ပါတယ်။

“မောင်”

မောင်ဟာကျမကို အလွန်ချစ်တယ်။ အလွန်ချုပ်ချယ်တယ် ၊ အလွန်သ၀န်တိုပါတယ်။ကျမဟာ အလွန်ချစ်တတ်တဲ့ မောင့်ရဲ့အချစ်တွေကိုပိုင်ဆိုင်ခဲ့ရတဲ့အတွက် ဟိုးငယ်စဉ်အချိန်က ကျေနပ်မှု ၊ ၀မ်းသာမှု ၊ ဂုဏ်ယူမှုတွေကို ခံစားခဲ့ရပါတယ်။ ဒါပေမယ့် ချုပ်ချယ်လွန်း ၊ သ၀န်တိုတတ်လွန်းတဲ့ မောင့်ကြောင့် ကျမမှာ အနေကျဉ်းကျတ်ပြီး မွန်းကျတ်မှုတွေပါ တပြိုင်တည်း ခံစားနေခဲ့ရပါတယ်။

တကယ်ပါ... ကျမတို့ အိမ်ထောင်သက် ၁၂နှစ်ပြည့်ပါတော့မယ်။ မောင်ဟာ ကျမအပေါ် ချစ်သူရည်းစားဘ၀တုန်းက အတိုင်းပဲ ချစ်နေဆဲ၊ ဂရုစိုက်နေမြဲ ၊ ချုပ်ချယ်နေဆဲ ၊ သ၀န်တိုနေမြဲ ပါပဲ ။

အခုအချိန်အထိ မောင်မပါပဲ မိန်းကလေးသူငယ်ချင်းတွေနဲ့အပြင်ထွက်လည်ကြရင်း မထင်မှတ်ပဲ ယောကျာင်္းလေးမိတ်ဆွေတွေပါလာခဲ့ရင် သိသိသာသာကို ငြိုငြင်တတ်ပါတယ်။ ကျမကလည်း ကိုယ်အမှားလုပ်တာမှ မဟုတ်ပဲနော်.. သူငယ်ချင်းမိတ်ဆွေတွေကို ပေါင်းသင်းတာပဲမို့ ကျမကို သ၀န်တိုငြိုငြင်ရင် တကယ်ခံစားရပါတယ်။ အချစ်ခံရလွန်းတော့လည်း တခါတလေ စိတ်ညစ်မိပါတယ်။

ဘလော့ဂ်မှာ မောင်လေးတွေ ၊ ညီမလေးတွေနဲ့ ကျမခင်ပါတယ်။ကျမက စိတ်ရင်းအတိုင်းပဲ ရင်းရင်းနှီးနှီး ခင်ခင်မင်မင်ပေါင်းတတ်ပါတယ်။ကိုယ်က အစ်မကြီးတစ်ယောက်လေ ။ မောင်လေးတွေ ညီမလေးတွေကိုလဲ တကယ်ခင်မိပါတယ်။အဲဒီအတွက်တော့ အိုကေပါတယ်။ ဘလော့ဂ်လုပ်ဖို့ မောင်က စတင်တိုက်တွန်းခဲ့တာပါ။ G talk မှာ invited လုပ်လာကြတဲ့ သူတွေကို accepted လုပ်ဖြစ်ပေမယ့် ယောကျာင်္လေးဆိုရင် Chatting မလုပ်ရဘူးဆိုတဲ့ မောင့်ရဲ့အမိန့်ကြောင့် ကျမ အကုန်လုံးကို ပြန်ပြီး block လုပ်ခဲ့ပါတယ်။ ဖြစ်ပုံများနော်... အဲလိုအူတိုတာလေ။ ကျမလဲ အဖွားကြီးဖြစ်ခါနီးနေပါပြီ။ မောင်ကတော့ အမြဲ အူတိုနေမြဲ ၊ အူတိုနေဆဲပါပဲ ။ ကျမမှာလဲ မောင့်ရဲ့အချစ်တွေနဲ့ ကျေနပ်နေပေမယ့် တစ်ခါတစ်လေတော့လည်း လိပ်ပြာသန့်တဲ့ ကိုယ့်ရဲ့စိတ်ကို မယုံကြည်သလိုကြီးခံစားရလို့ အခံရခက်နေမိခဲ့ပါတယ်။

မောင်က ကျမကို အခုအချိန်အထိကလေးတစ်ယောက်ကို ချစ်သလို အရမ်းချစ်နေဆဲပါပဲ။သူက ကျမကိုချစ်လွန်းတော့ ကံကြမ္မာဆိုတာ သိနိုင်တာမဟုတ်ဖူးတဲ့ အကြောင်းတစ်မျိုးမျိုးကြောင့် ကွဲကွာသွားရမှာကို သူအလွန်စိတ်ပူကြောင်း ပြောပြီး ၊ ကျမကိုချုပ်ချယ်သ၀န်တိုမိကြောင်းတွေပြောပြတတ်တယ်လေ။

မောင် ကျမကိုအရမ်းချစ်တယ်ဆိုတာကို ကျမခံစားလို့ရပါတယ် မောင်ရယ်။ဒါပေမယ့် မောင့်ရဲ့အချစ်တွေ ၊ ချုပ်ချယ်မှုတွေ ၊ သ၀န်တိုမှုတွေအောက်မှာ တခါတလေလဲ စိတ်ကျဉ်းကျပ်လွန်းလို့ မကျေနပ်မှုလေးတွေခံစားရပါတယ်။တစ်ခါတစ်လေတော့လည်း သြော်..သူက ငါ့ကိုအရမ်းချစ်လို့ သ၀န်နိုတာပဲလေ ၊ ယူကြပြီးမှ ကိုယ့်ဇနီးမယားအပေါ် မချစ်ခင် ၊မကြင်နာတတ်ကြတဲ့ ယောကျာင်္းတွေထက်စာရင် ကိုယ့်အပေါ်အရမ်းချစ်တဲ့ ယောကျာင်္းတစ်ယောက်ကို ပိုင်ဆိုင်ထားရတာပဲ ငါအရမ်းကံကောင်းပါတယ်လို့ ကိုယ့်ကိုယ်ကို နားလည်ခွင့်လွတ်မှုတွေနဲ့ ဖြေသိမ့်ရပါတယ်။

သြော်... အချစ်တဲ့ ... အမျိုးမျိုးပါပဲနော်.....

ကျမပိုင်ဆိုင်ထားတဲ့ မောင့်ရဲ့အချစ်တွေက ထွန်းအိန္ဒြာဗိုလ် ရဲ့သီချင်းလေးလိုပါပဲ... “ငါပိုင်ဆိုင်တဲ့ အချစ်တွေက မီးနဲ့ရေ ”တဲ့....

တစ်ခါတစ်လေတော့လည်းကျမဟာ မောင့်ရဲ့အချစ်တွေနဲ့ ပူလောင်နေတတ်ပါတယ်...
တစ်ခါတစ်လေတော့လည်းကျမဟာ မောင့်ရဲ့အချစ်တွေနဲ့ အေးမြနေတတ်ခဲ့ပါတယ်...


တစ်ခါတစ်လေတော့လည်း အူတိုတတ်လွန်းတဲ့ မောင့်ရဲ့အချစ်တွေနဲ့ မွန်းကျပ်နေမိပြန်ပါတယ်....
တစ်ခါတစ်လေတော့လည်း အရာရာမှာ ကျမကို ဦးစားပေးအလိုလိုက်တတ်တဲ့ မောင့်ရဲ့အချစ်တွေအတွက် ဂုဏ်ယူနေမိပြန်ပါတယ်...

ဘာပဲဖြစ်ဖြစ်...ကျမကို အရမ်းချစ်တဲ့ မောင့်ရဲ့အချစ်တွေကြောင့် မောင့်ကို ကျမနားလည်ပေးနေမိပါတယ်မောင်ရေ.....

စိတ်ချပါမောင်...ကျမအပေါ်အရမ်းချစ်တဲ့ မောင့်အပေါ် ကျမဘယ်တော့မှ သစ္စာမပျက်ပဲ ကျမအသက်ရှူရပ်တန့်သွားတဲ့ အချိန်အထိ သည်းခံခွင့်လွတ်ခြင်းတွေနဲ့ အမြဲလက်တွဲသွားမှာပါ မောင်ရေ.... မောင်သာ ကျမရဲ့ဘ၀ပါ... မောင်သာ ကျမရဲ့ကမ္ဘာပါ ...


ကဲ... ကျမရဲ့အချစ်အကြောင်းလေးကတော့ ဒီလောက်ပါပဲရှင်။

အချစ်ဆိုတာ ??????????????????????????????????????????????????????????

စိုင်းစိုင်းခမ်းလှိုင် ရဲ့ သီချင်းလေးကတော့ “အချစ်ဆိုတာ ချစ်နေဖို့ပဲလိုအပ်ပါတယ်”တဲ့ လေ.....


“နှစ်ဦးနှစ်ဖက် နားလည်မှုများနဲ့ သ၀န်တိုခြင်းကင်းစွာ ချစ်တတ်ကြပါစေ.....”


လေးစားခင်မင်လျှက်

ဝါ၀ါခိုင်မင်း